旺角西洋菜南街行人專用區設立的原意到底係乜呢?
如果我無理解錯,應該係因為旺角在平日夜晚、假期時人流太多,西洋南街的行人路實在不足以應付人流,太擠迫,所以就於特定時間將馬路劃為行人專用區以舒緩擠迫狀況。
不過依家啲情況呢?
有一堆人長期劃地為王,呢啲人包括俗稱「街霸」的電訊、寬頻 Sales;很多自稱為搞藝術其實是每天9叫阻路自我滿足的人;拍照、畫畫收錢的人;商業宣傳派發贈品的人;政黨、教會的攤位等等等等...
「街霸」的話,其實一直以來都有,由於他們的攤位不大,實際上又沒有很滋擾的行為也就算了。
拍照、畫畫收錢的人,其實也是商業活動的一種啦,不過基於佔地不多,活動又係靜態,我覺得還可以隻眼開隻眼閉。
商業宣傳的,都係大品牌,其實我覺得係幾煩,不過基於成本問題,都唔會搞好耐,始終派贈品要錢、Show Girl 又係要錢、租架大貨車都要錢,所以你多數唔會每次出旺角都見到佢哋,撞到就當係自己唔好彩啦。
最令我覺得反感煩厭的,就係嗰啲由朝到晚9叫自 high 的阿叔。
無自知之明,9叫當唱歌,居民投訴過都無用,呢啲事新聞都曾經報道過。
惡霸行為,竟然係地下貼晒膠布海佈,當正自己專用咁,唔知大家仲記唔記得,曾經有殘障兒童團體去旺角表演,地點剛好就在某霸地9叫阿叔的地頭,9叫阿叔惡言相向,即使團體表示表演時間很短,完了就走,阿叔仍不放過他們。
這事當時新聞也有報道,9叫阿叔見勢色不對,事後態度稍有軟化,不過仍沒有認錯。
仲有其他玩雜技、自 high 「跳舞」阿叔等等其實都係一樣乞人憎。
其實依家呢啲人搞到成條西洋菜南街仲塞過未有行人專用區時,根本就係違反設立行人專用區嘅原意。
呢班人令人成個道路情況更擠迫、惡劣,佢哋覺得劃地為王自 high 天經地義,受苦的就係去旺角的香港市民、本區居民和遊客。
最令人氣憤就係政府竟然完全不加管理,如果行人專用區是各人都可以使用,權利平等,點解有啲人可以劃地佔地,趕走其他使用者?
如果佢哋行為影響其他人甚至本區居民,政府為何不出手?是懶得搞?定係欺善怕惡?
其實講惡,今時今日仲邊有市民夠政府惡?所以我幾對覺得係政府懶得理懶得管。
黑心啲講句,前排旺角成日有人掉通渠水,我覺得就係呢班9叫自 high 大叔長期惡行迫出來的。
掉咁多次都掉唔中佢哋,每次都中無辜市民,我多少覺得不忿,他們應該多少得到點教訓的。
另外,什麼是街頭藝術?看看外國的街頭演唱係什麼質素。
表演者只會用合理的音量,一支結他一個咪、一個小型擴音機就夠,不會盡力有幾大聲開幾大聲,一大堆音響排出來覺得自己好威威,唱功當然也不是香港那些9叫大叔能比。
有些甚至連擴音機都沒有,一支結他就自彈自唱,全都很自律。
因為佢哋求的是大家的欣賞,也顧及其他人的空間,而不像香港9叫大叔目空一切,只顧自我滿足。